Katsina Post

‘Yanbanga 5 an nemesu an rasa bayan arangama da ‘yanbindiga a Safana 

Wasu ‘yanbanga su 5 sun ɓace ɓat bayan wani gumurzu da suka yi da ‘yanbindiga a ƙauyen Dogon Marke dake ƙaramar hukumar Safana a jihar Katsina.

An nemi ‘yan bangan sun ɓace a lokacin da suke ƙoƙarin hana ‘yanta’addan tserewa a wani harin da sojoji suka kai da misalin ƙarfe 7:30 na yammacin jiya a kewayen Zakka dake unguwar Yauni a ƙaramar hukumar Safana.

Majiyar ta bayyana cewa, sojojin sun samu nasarar kai hari sansanin ‘yanbindigar, inda suka kawar da wasu, da ƙona dukiyoyinsu. Sai dai abin takaicin shi ne, ‘yanbanga biyar har ya zuwa yanzu ba a gansu ba a lokacin da suke ƙoƙarin daƙile hanyoyin tserewar ‘yanta’addan daga hannun sojoji.

Majiyar ta tabbatar da cewar, dakarunsu na ƙauyukan Kantamawa, Yabbudu, Wurma, Kudewa da Danzangi sun tare hanyoyin tserewa daga ‘yanta’addan tare da fatattake su tare da raunata wasu.

Saida har ya zuwa yanzu suna alhinin rashin ganin jami'ansu guda 5 da basuda labarin su, da suka haɗa da; Rabe Yabbudu, Bala Mai Saida Lohe, Muhammadu Yabbudu, Musa Chogal da Bala Na Rimi.

Saide Sojoji da ‘yansanda ba su tabbatar da lamarin ba har zuwa lokacin gabatar da wannan rahoto. Domin Kakakin runduna ta 17 ta sojojin Najeriya Oiza Ehinlaiye, a lokacin da aka kirata tace tana kan hanya ta kuma yi alƙawarin idan ta tsaya za ta maida ba'asi,  amma daga baya wayarta a kashe.

Wakilin Katsina Post ya tuntuɓi mai magana da yawun ‘yansandan jihar Katsina ASP Abubakar Sadiq Aliyu gameda lamarin, saide har lokacin haɗa wannan rahoton bai bada tabbacin faruwar lamarin ba saide yace za su bincika lamarin.